Avsendarfokus i portalar

Ser at Anders Ericson på Blogg og bibliotek har havna i eit særdeles interessant ordskifte med både hovedaksjonær og dagleg leiar Tor-Arne L. Jensen i TS ProCon og journalist Eva Tønnessen i Computerworld.

Les min støtteerklæring her:

Utgangspunktet var at Tønnessen samanlikna den relativt talentlause portalen servicetorget.no med norge.no - "veien til offentlig informasjon og offentlige tjenester i Norge". Anders E. hamrar inn ei rekke svært gode og godt framførte poeng om den særdeles slette kvaliteten på servicetorget, m.a. rett og slett utidig produktplassering frå TS ProCon, irriterande sprett-opp-vindauge, ei rekke særdeles graverande strukturfeil, dårlig kvalitetssikra innhald og ei rekke andre lite tillitsvekkande feil både på nettstaden og i andre produkt frå ProCon (infokioskar som selskapet har plassert i Moss har aldri fungert, ifølge Anders).

Jensen prøver seg på eit lite taktfullt tilsvar i kommentarfeltet til artikkelen, der han hovudsakleg skjeller ut angriparen og etter fattig evne prøver å reinvaske seg sjølv og selskapet. Han får heldigvis svar på tiltale!

Sjølv stiller eg meg herved bak Anders E. sine poeng. Servicetorget.no er eit typisk døme på ein avsendarfokusert nettstad, der avsendar sine behov for å spre informasjonen dei tilfeldigvis sit inne med, går fullstendig på bekostning av brukarane sine oppgåver og behov .

For å utdype dette - her er mine kjenneteikn på avsendarfokuserte nettstader:

• Språket er prega av stammespråk og faguttrykk
  
• Lange, byråkratiske og "110% korrekte" setningar
  
• Informasjonsstrukturen på nettstaden speglar avsender sitt organisasjonskart
  
• Innhaldet på nettstaden er uprioritert, alt er like viktig
  
• Avsendar trur at brukarane er interessert i det same som dei sjølv
  
• Ein har ein tendens til å overvurderer brukarane si tålmodigheit
  
• Tekstar er utforma for papir, ikkje optimalisert for nettet

Motsatsen til avsendarfokus er brukarfokuserte nettstader, med følgande kjenneteikn:

• Språket er haldt i "brukarane sine eigne ord"
  
• Setningsbygnadane er korte, presise og forståelige
  
• Informasjonsstrukturen på nettstaden speglar brukarane sine viktigste oppgåver
  
• Innhaldet er prioritert ut ifrå brukarane sine behov
  
• Avsender veit og tek hensyn til at brukarane lever sine eigne liv og har andre prioriteringar enn dei sjølve
  
• Ein har respekt brukarar i tidsnød, og gir raske svar på påtrengande spørsmål
  
• Tekstar er utforma og optimallisert for nettet (korte ord og setningar, aktivt språk, skummevennlig sidestruktur)

Det einaste poenget eg må få lov til å arrestere Anders E. på, er at norge.no heller ikkje nødvendigvis er eit prakteksempel på brukarfokusert design i høve til lista over. Mellom anna er formålet med den dominerande globale menystrukturen (venstremenyen) tydeligvis først å fremst å ramse opp organisasjonskartet i staten, til fordel for brukar- og oppgåveorienterte temainngangar.

(Her har norge.no-redaksjonen riktignok skjerpa seg litt, og gitt auka fokus til temainngangar i høve til korleis situasjonen var for eit par år sidan. Utan å nødvendigvis ta heile æra for det, så har eg ein sterk hypotese om at redesignet har samanheng med eit seminarinnlegg eg haldt for offentleg forvaltning for ei tid tilbake, der eg sterkt kritiserte prioriteringane på norge.no. Eit par månader etterpå var omprioriteringa eit faktum, og her er beviset...)

Men servicetorget.no er heilt klart mange hakk verre, og det må også Jensen tåle å høyre. Som "ekspert" bør han jo som eit minimum være i stand til å imøtegå kritikken. I staden går han etter mannen, og ikkje ballen...